હેમંત ગોહિલ ‘મર્મર’ ~ ફાગણની વાત

🥀🥀

*ફાગણનું ગીત*

ફાગણની વાત સખી નહીં બોલું ફળિયે , ફળિયું તો સાવ અળવીતરુ …..
મનગમતી વારતાના મનમાં મંડાણ કરી ,મનમાં ઉઘાડ એના ચીતરું .

સૂકીભઠ્ઠ ડાળખીને ફૂટે કૂંપળ એમ
મારી ભીતર હું તો મ્હોરતી ;
એકાદું ફૂલ કોઈ આંગણામાં નીરખી
સૌરભના સાથિયા હું દોરતી .
માથાબોળ નાવણના એવા અભરખા કે સમણું ય લાગે છે હવે છીછરું ..

એકલદોકલ ક્યાંક ટહૂકો ખરતો ‘ને
એનો રેશમિયો લાગે છે ભાર,
ઠેસ જેવું હોય તો સમજ્યું સમજાય આતો
ભીતરમાં વાગે ભણકાર .
વાદળ વિનાનું સાવ કોરું આકાશ તોય કેવી હું લથબથ નીતરું !!…

શેરીની જેમ મારી લંબાતી જાય આંખ
પગલાંની છાપને પીછાણવા ,
પીંછા ગણવાની વાત લાગે છે હાથવગી
ઊડ્યા અવસર કેમ આણવા ?
પૂછે પરનાળ મને નેવાંની વારતા તો નળિયું ભાંગીને કરું

~ હેમંત ગોહિલ ‘મર્મર’