કોડિયાં એલી નહીં ~ ઉજમશી પરમાર
કોડિયાં એલી નહીં રે મીં તો જેગવી દીધાં તન
જંપવા દેતું હોય લગીરે, તોય આ મારું મન.
સાંજ પડે ને વાયરે કોનાં પગલાં ભીનાં વાય
દોડવું મારે નહીં ને અલી દોડું દોડું થાય
હીંચવા માંડે ઘર ભરીને ગાણાનું ગવન.
ટોડલાં મૂઆં ટહુકે મારે શરમાવાનું રયું
નેવાં ઊઠી ડોકિયું કરે, રોજનું આ તો થ્યું
ભીંતમાં ગરું તોય તે યાંથી આવશે રે સાજન..
કોક જો આવે હાથનું ભરત મેલી ઊભી થઉં
ફળિયું મારી મોર્ય લળીને જોવે પછી હઉં
’ઇ’ હશે તો દોટ મેલીને પરખી લ્યે પવન…
~ ઉજમશી પરમાર
કવિની નાયિકા કોડિયાં નહીં, તન ‘જગવી દે’ છે. અહીં ‘જગવી દીધા’ જેવો ગામઠી પ્રયોગ ખૂબ રસપ્રદ બની ગયો છે. પિયુની વાટ તનમનમાં જે આગ લગાડે છે એનું અહીં રસભર્યું નિરૂપણ છે.
કવિના આ ગીતમાં કેટકેટલાં પ્રતિકો જીવંત બની ઊઠ્યાં છે. કાવ્યમાં નિરૂપેલાં બધાં જ પ્રતિકોમાં પૂરેપૂરાં માનવીય ભાવોનું આરોપણ થયું છે. વાયરાની સાથે પગલાં વાય છે અને ગાણાનું ગવન ઘર ભરીને હીંચ્યા કરે છે. ટોડલાં ટહૂકે છે ને નેવાં ડોકિયાં કરે છે. અરે, ફળિયુંયે લળી લળીને જુએ છે. કવિતાના શબ્દો ગાનને એકદમ અનુરૂપ છે. આખાય કાવ્યનો એક અખંડિત લય છે અને એમાં વહે છે મીઠો પ્રતિક્ષા રસ….. જોબનનો આ કદીય ન ખૂટનારો ભાવ છે.
OP 8.6.22
**
આભાર
11-06-2022
પ્રતિભાવ આપનારા સૌ મિત્રોનો દિલથી આભાર
‘કાવ્યવિશ્વ’ની મુલાકાત લેનારા મિત્રોનો પણ આભાર
વિવેક મનહર ટેલર
09-06-2022
સ-રસ રચના.
Parbatkumar Nayi
08-06-2022
વાહ
સરસ ગીત
આભાર
08-06-2022
સિકંદરભાઈ અને લલિતભાઈ સાચી વાત. શરતચૂકથી બીજો ફોટો મુકાઇ ગયો હતો. ભૂલ સુધારી લીધી છે. ધ્યાન દોરવા બદલ આભારી છું.
દીપકભાઈ, સરલાબહેન, રેખાબહેન, છબીલભાઈ અને સૌ મિત્રોનો આભાર.
Dipak Valera ADVOCATE
08-06-2022
ખૂબ સરસ અને સરળ ગીત જેગવી દેવો ગામઠી તળપદો શબ્દ બહુ ગમ્યો આખું ગીત મજા પડી અભિનંદન કવિ
લતા બેન આપને પણ
લલિત ત્રિવેદી
08-06-2022
કવિ શ્રી ઉજમશી પરમાર…. એક ખૂબ સારા વાર્તા સર્જક અને ગીત કવિ… પણ પોંખાયા બહુ જ ઓછા… આપે આ ગીત નો સરસ આસ્વાદ કરાવ્યો…
Sarla Sutaria
08-06-2022
ખૂબ સરસ ગામઠી ગીત.
ટોડલા, નેવા, ગરુ, જેવા અસલ શબ્દો વાંચી મજા આવી ગઈ.
છબીલભાઈ ત્રિવેદી
08-06-2022
ઉજમશી પરમાર નુ ખુબ સરસ ગીત ગામઠી શબ્દ પ્રયોગ કાવ્ય ને ઓર ઉઠાવ આપે છે વાહ સરસ આભાર લતાબેન
સિકંદર મુલતાની
08-06-2022
વાહહ..
સરસ ગીત..
ઉજમશીભાઈનું આ ગીતનું પઠન કર્ણપટ પર તાજું થયું..
તા.ક.
ઉજમશીભાઈના ફોટાની બદલે અહીં કોઈ બીજો ફોટો મૂકાયો છે…
રેખાબેન ભટ્ટ
08-06-2022
કવિશ્રી ઉજામાશી પરમાર નું આ ગીત એમના જ કંઠે સાંભળવાનો લ્હાવો મળેલ છે . ગાંધીનગરમાં રહેવાનો આ લાભ.
કવિશ્રી દલપત પઢીયાર અને હરેકૃષ્ણ પાઠક સાહેબ ને પણ સાંભળવાનો લ્હાવો મળ્યો છે. ખૂબ સુંદર ગીતો….