અમે સૂતા ઝરણાંને જગાડ્યું,
ઉછીનું ગીત માગ્યું,
કે ગીત અમે ગોત્યું ગોત્યું ને ક્યાંય ના જડ્યું.
અમે વનવનનાં પારણાંની દોરે,
શોધ્યું ફૂલોની ફોરે,
કે ગીત અમે ગોત્યું …
અમે ગોત્યું વસંતની પાંખે;
ને વીજળીની આંખે,
કે ગીત અમે ગોત્યું …
અમે શોધ્યું સાગરની છોળે,
વાદળને હિંડોળે,
કે ગીત અમે ગોત્યું …
અમે ગોત્યું કંઇ સેંથીની વાટે,
લોચનને ઘાટે,
કે ગીત અમે ગોત્યું …
અમે ખોળ્યું શૈશવને ગાલે,
કે નેહ-નમી ચાલે,
કે ગીત અમે ગોત્યું …
અમે જોઇ વળ્યાં દિશદિશની બારી;
વિરાટની અટારી,
કે ગીત અમે ગોત્યું …
ઉરે આંસુ પછવાડે હીંચતું,
ને સપનાં સીંચતું,
કે ગીત અમે ગોત્યું …
~ ઉમાશંકર જોશી
કવિનું જાણીતું મજાનું ગીત..
વાહ શાળા મા ગવાતુ ગીત ખુબ ગમ્યું કવિ શ્રી ની ચેતના ને પ્રણામ
કવિને ગીત કે કવિતા ગોતવા ક્યાં ક્યાં જવું પડે, આમતો ઉ.જો. એ જ કહ્યું છે. સ્મૃતિ વંદન.
સૌ પ્રતિભાવકો અને મુલાકાતીઓનો આભાર.