પપ્પા તમે જલ્દી આવો
પપ્પા, તમે જલ્દી આવો
આગની જ્વાળાઓ વચ્ચેથી તમે મને બચાવો
પપ્પા, તમે જલ્દી આવો…
પહેલાં મોટો ભડકો થયો ને પછી સળગ્યો દાદર
દોસ્ત બધા સળગવા લાગ્યા, જાણે હોય કોઇ કાગળ
ડર મને પણ લાગ્યો’તો, મુઠ્ઠીઓ વાળી હું ભાગ્યો’તો
હાથ જોડી આગ પાસે, મારગ મેં પણ માંગ્યો’તો
હાથ લગાડી તમારો, આ અજવાળાને ભગાડો
પપ્પા, તમે જલ્દી આવો
ચીસો મેં પણ પાડી’તી, મદદ મેં પણ માંગી’તી
વાત તમારી માનવાની, માનતા મેં પણ રાખી’તી
કહ્યું ઇશ્વરને, પરેશાન કરીશ નહીં મમ્મીને કદી
થોડીવાર માટે પણ પ્લીઝ, તું મોકલ અહીં નદી
હું પણ હવે સળગી રહ્યો છું, પાણી મને લગાડો
પપ્પા, તમે જલ્દી આવો
ઝાળ બળી, શ્વાસ રૂંધાયા, આંખે અંધારા આવ્યા
મોટી અગનજ્વાળાઓ વચ્ચે તમે જ મને દેખાયા
ધીમે-ધીમે હું પણ હવે બળી જવાનો, પપ્પા
જ્યાંથી આવ્યો હતો ત્યાં જ ફરી જવાનો, પપ્પા
લાશોનાં ઢગલા વચ્ચેથી, મને બરાબર ઓળખજો
પપ્પા, હવે જલ્દી આવો….
~ એષા દાદાવાળા
હે મૃદુ મક્કમ સજ્જન!
હે મૃદુ મક્કમ સજ્જન! એમાં નથી તમારો વાંક
લણનારા તો લણ્યા જ કરશે આ રોકડીયો પાક
પુનરાવર્તન દુર્ઘટનાનું અમથું ન કંઇ સંભવે !
તમે દયાળુ છો તેથી તો હ્રદય તમારૂ દ્રવે
ધારો છો એના કરતાં તો બમણાં એ ચાલ્લાક
હે મૃદુ મક્કમ સજ્જન! એમાં નથી તમારો વાંક
વ્યથા તમારા દિલની એ તો ઘોળીને પી જાશે
આ તો એવી ઉધ્ધઇ છે જે ઉભા વૃક્ષને ખાશે
જાણે ખુલ્લુ ખેતર એમાં નથી કોઈની ધાક
હે મૃદુ મક્કમ સજ્જન! એમાં નથી તમારો વાંક
~ કૃષ્ણ દવે
બન્ને રચના સાંપ્રત સમયની છે..
મનને સ્પર્શી જાય છે.
હૃદયસ્પર્શી રચનાઓ
ખૂબ આર્તનાદ પપ્પાને નામે, ખૂબ સરસ રચના.
રાજકોટ અગ્નિકાંડ વિષયક એષા દાદાવાળાની તથા કૃષ્ણ દવેની રચનાઓ ખૂબ જ હ્રદયસ્પર્શી ! બંને સર્જકમિત્રોને મારી અશ્રુભરી સલામ !
હ્રદય સ્પર્શીરચના ખુબ પિડાદાયક
અદ્ભુત બંને રચનાઓ