ન સવાર થઈ ~ કવિ રાવલ
ન સવાર થઈ ન સાંજ થઈ – ન વહી હવા, ન બહાર થઈ
ન થયું કશું – ન થશે કશું – હું ઊભી છું માત્ર અભાવ થઈ
અહીં બંધ છું હું કમાડ સમ નહિ આપમેળે ખુલી શકું
વિધિવત મને જો તું ખોલશે – હું તને મળીશ ઉઘાડ થઈ
તરુવર હરિત ને હવા પુનિત, ઋજુ વાદળી ને છે તારલો
મુનિવર સમા છે પહાડ ને સરિતા વહે છે વહાલ થઇ
એ ભલે વહે ને વહે સદા ને વહે ભલેને બધી તરફ
અનુભૂતિ જ નવી નવી મને આ પહેલી જ વાર થઈ
હું આ ઝાડ થૈને ઊભી રહું કે પરણ થૈ ખખડ્યા કરું ?
છું હું બીજમાં ને બધેય હું જ છું મૂળભૂત વિચાર થઈ
~ કવિ રાવલ
આ ગઝલ અભાવથી શરુ થતી, વહાલમાં વહેવા ઝંખતી, આખરે સ્વના ઉઘાડમાં વિરમે છે. વ્યક્તિથી સમષ્ટિ સુધી, અંગતથી અસ્તિત્વવાદ સુધી અને એમ જોઇએ તો જીવનના બધા જ વહેણને આવરતી આ ગઝલમાં મનની અકળ મૂંઝવણોની અભિવ્યક્તિથી શરૂઆત થાય છે.
‘હું ઝાડ થઇને ઊભી રહું કે પર્ણ થઇ ખખડ્યા કરું ?’ એ અમુક અંશે અસંમજસની અવસ્થા છે. પહેલા સૂકાયેલું મન અને પછી જાગતી વહાલની તરસ અને મનોભાવોનું પ્રકૃતિમાં આરોપણ. કંઇક એની સાથેની જ જોડાયેલી આ અવસ્થા છે પરંતુ આખરે ચિંતનમાં ગઝલની સમાપ્તિ થાય છે. એ છે સ્વનું સર્વમાં ફેલાવું. જાતમાં જગતને અને જગતમાં જાતને જોવી. બીજથી બ્રહ્માંડ સુધી મૂળનો વિસ્તાર અને વિચારની સચરાચરમાં વ્યાપ્તિ.
OP 31.5.22
આભાર
03-06-2022
ખૂબ ખૂબ આભાર લલિતભાઈ, મેવાડાજી, પ્રફુલ્લભાઈ, કિશોરભાઇ, બકુલેશભાઈ, છબીલભાઈ, રૂપલબેન, રેણુકાબેન.
‘કાવ્યવિશ્વ’ના સૌ મુલાકાતીઓનો આભાર
રૂપલ એ.મહેતા.
01-06-2022
ખૂબ સરસ રસદાર રચના ,
ને આસ્વાદ અભિવ્યક્તિ …
જોરદાર!!
Renuka Dave
01-06-2022
ખૂબ સરસ આસ્વાદ્ય રચના.
શબ્દ, લય અને ભાવનું મસ્ત મજાનું સંયોજન..!
લખતા રહેજો, કવિ..
લલિત ત્રિવેદી
31-05-2022
સરસ… સરળ ગઝલ… રસપ્રદ આસ્વાદ
સાજ મેવાડા
31-05-2022
વાહ, ગઝલ ખૂબ અઘરા કામિલ છંદમાં. કાબિલે દાદ છે જ. અને લતાજી આપે ખૂબ સુંદર રીતે આસ્વાદ કરાવ્યો.
પ્રફુલ્લ પંડ્યા
31-05-2022
કવિશ્રી રાવલની સુંદર ગઝલ જાણે કે નજાકતભર્યુ કોતરકામ છે.ભાવ વિશ્વ પણ એટલું જ સુંદર પણ સૌથી સુંદર અને રૂચિકર તો એનો તંત્રીશ્રીએ કરાવેલો આસ્વાદ છે.લતાબેન કૃતિને રજૂ તો કરે જ છે પણ કૃતિને આકર્ષક રીતે ખોલી પણ આપે છે.
કિશોર બારોટ
31-05-2022
સરસ ગઝલ. 👌
બકુલેશ દેસાઈ
31-05-2022
વાહ ‘ કવિ ‘ અભિનંદન… વ. ગાંઠના પણ
છબીલભાઈ ત્રિવેદી
31-05-2022
કવિ રાવલ ની મસ્ત રચના ખુબ સરસ ભાવ પ્રગટ કરતી ગઝલ આભાર લતાબેન