હિબકે ચડ્યા છે ઠાકોર !
હિબકે ચડ્યા છે ઠાકોર !
પાંચસોની નોટ લઇ દર્શનને વેચવાની
કળા કરે છે કયો મોર ?
હિબકે ચડ્યા છે ઠાકોર !
હેતે હંકારીને ગાડે બેસાડી મને
લાવ્યા’તા ભગત બોડાણા
નિરાંતે ગામને હું દર્શન દેતો’તો એમાં
તમને કાં નાણાં દેખાણા ?
મનમાં બેઠો છે ચોર એટલે તો શ્રાવણના
દિવસો પણ કોરા ધાકોર !
હિબકે ચડ્યા છે ઠાકોર !
દર્શન હું દઉં એ તો ખેલ છે તમારો
ને ઉભો ઉભો હું બધું જોઉં છું
મારી ગરજે હું દીનદુખીયા નારાયણના
દર્શન કરવાને ઉભો હોઉં છું
મનમાં તો થાય છે કે અત્યારે, અબઘડીએ
તજી દઉં આવું ડાકોર !
હિબકે ચડ્યા છે ઠાકોર !
~ કૃષ્ણ દવે.
તા-૨૬-૮-૨૦૨૩
સાંપ્રત ઘટનાઓનો તરત પડઘો પાડનાર કવિ કૃષ્ણ દવે તત્કાલીન બનાવો સંબંધે એમની કલમમાંથી એવી કવિતા પ્રગટે છે કે એમાં સવાલ અને જવાબ બંને મળી જાય…
જ્યારે બજરંગબલી જાગશે !
જ્યારે બજરંગબલી જાગશે !
લંકામાં આગ ફરી લાગશે,
જ્યારે બજરંગબલી જાગશે !
એક ગદામાં જુઠ્ઠાણું ભાંગશે,
જ્યારે બજરંગબલી જાગશે !
સેવા હનુમાન કરે એવું ઈચ્છો છો તો
પહેલા તો લઈ આવો રામ
ભાગેલી નહીં એ તો જાગેલી જીન્દગીના
દોડી દોડીને કરે કામ
ચરણરજ એની એ માથે ચડાવશે ને
બેસવાનું સામેથી માંગશે
જ્યારે બજરંગબલી જાગશે !
આ તો છે આખ્ખી’યે દુનીયાના દાદા ને
દાદાને સળીયું ના હોય
વિકૃતિ જન્મે જ્યાં એવા દિમાગની તો
સાફ સૂફી કરો ધોઈ ધોઈ
મંદિરને બદલે શોકેશ બની જાશે ત્યાં
જેને હનુમંતપણું ત્યાગશે
જ્યારે બજરંગબલી જાગશે !
~ કૃષ્ણ દવે
તા-31-8-2023
આજકાલ બે વિવાદો સૌની જીભે ચડ્યા છે. એકનું સમાધાન થયું છે. બીજું હજી ‘ધર્મ’ એટલે શું એ પ્રશ્નાર્થ પકડીને ઊભું છે. કોઈને ‘નાના’ બનાવવામાં ધર્મ તો નથી જ પણ આવી વૃત્તિ ક્ષુદ્રતાની પરાકાષ્ઠા છે.
બન્ને કાવ્ય ખુબ ગમ્યા અભિનંદન
મારા આદરણીય કવિ શ્રી કૃષ્ણ દવે ખૂબજ સંવેદનશીલ કવિ છે, સામ્પ્રત બનાવો ને એ ખૂબ જ અસરકારક રીતે કવિતા માં વણી લે છે.