🥀 🥀
*ગુજરાતી કવિઓને ધાકધમકી*
શબ્દને વાળો કે ચોળો કે બે પગની વચ્ચે રગદોળો
પણ ખબરદાર ! હાથ જો લગાડ્યો છે
આંખ કે અવાજ કે આકાશને તો –
શબ્દને પથ્થરની જેમ ભલે ભાંગો
કે પાંચીકાની જેમ છો ઉછાળો
પણ ખબરદાર ! ઊંચી કરીને આંખ જોયું છે
સાંજ કે સમુદ્ર કે સુવાસને તો –
શબ્દોના ખાતે ઉધાર કીધી કેટલી અનુભૂતિ,
કેટલી અભિવ્યક્તિ, કેટલા વિચારો !
રોકડામાં સિલ્લક છે જાત અને ‘કવિરાજ’
શબ્દ એક એકલોઅટૂલો બિચારો !
શબ્દોને દાઢીને જેમ ઉગાડો કે
બુકાની બાંધવાને મોં પર વીંટાળો
પણ ખબરદાર ! બત્રીસી તોડી નાખીશ જો બતાવ્યા
છે બિંબપ્રતિબિંબને કે આસપાસને તો –
શબ્દોને ઠોકી ઠોકીને કીધા ગાભણા ને એમાંથી
કાઢ્યાં કૈં કોટિ કરોડ નવા શબ્દના ઈંડાઓ
શબ્દોને ચાવીને, ચૂંથીને, ધાવીને, ઝધ્ધીને ઝધ્ધીના
કવિઓએ ઠોક્યા છે ગુજરાતી શબ્દના ભીંડાઓ
દોસ્તો! આ શબ્દોને તોડો કે ફોડો કે આંગળી કરીને ઢંઢોળો
પણ ખબરદાર ! છેટા રહેજો બધાંય મૌનથી મકાનથી ને
પડશે તો અડશો ઉજાશને તો –
~ ચંદ્રકાંત શાહ (24.7.1956 – 4.11.2023)
કવિને સ્મૃતિવંદના
ખુબ સરસ રચના સ્મ્રુતિવંદન
રચના રમતિયાળ અને મસ્તીભરી તો છેજ એથી વિશેષ કંઈ સાર્થકતા હોય તો મને નથી સમજ
વાહ 👌🏻👌🏻👌🏻
આને સરરીયાલીસ્ટીક કવિતા કહેવાય?
કવિને પૂછવું પડે ! પણ એ તો ગયા !….
ગુજરાતી કવિઓ આડેધડ શબ્દો ઉછાળી કવિતા લખે છે એને કવિ વારંવાર ‘ખબરદાર ‘કરે છે.એ શબ્દથી ચેતવે પણ છે ને ધમકી પણ આપે છે.
કવિને વંદન.