ચંદ્રકાન્ત અંધારિયા ‘બદમાશ’ ~ હાસ્યરચના * Chandrakant Andhariya & નાઝીર દેખૈયા * Nazir Dekhaiya

પેરેડી

આપે ન કો’ ઉધાર, તમારા ગયા પછી,
આવે છે લેણદાર, તમારા ગયા પછી !

દરરોજ જોઉં છું હું ફિલમ ત્રીજા ખેલમાં,
ના કોઈ ટોકનાર, તમારા ગયા પછી !

તેજીમાં કાલ જે હતી મંદીમાં આવી ગઈ,
શૃંગારની બજાર, તમારા ગયા પછી !

ઘર-કામ કાજ વહેલો હું ઉઠતો’તો પણ હવે,
મોડી પડે સવાર, તમારા ગયા પછી !

‘બદમાશ’, ચોર, ગુંડા, લફંગા મળી બધા,
ઘરમાં રમે જુગાર, તમારા ગયા પછી !

~ ચંદ્રકાન્ત અંધારિયા ‘બદમાશ’

મૂળ રચના

દિલને નથી કરાર તમારા ગયા પછી ,
આંખે છે અશ્રુધાર તમારા ગયા પછી…

યત્નો કર્યા હજાર તમારા ગયા પછી ,
લાગ્યું ન દિલ લગાર તમારા ગયા પછી…

વીતી રહ્યો છે એક સરીખો સમય બધો,
શું સાંજ શું સવાર તમારા ગયા પછી…

ખીલે તો કેમ ખીલે કળી ઉર-ચમન તણી ,
આવી નથી બહાર તમારા ગયા પછી…

મહેફિલ છે એ જ એ જ સુરા એ જ જામ છે ,
ચડતો નથી ખુમાર તમારા ગયા પછી….

જીવતો તાંતણો છે તમારા જ દમ સુધી ,
તૂટી જશે ધરાર તમારા ગયા પછી…..

‘નાઝિર‘ને છેક ઓશિયાળે ને તમે કરો,
કરશે ન કોઈ પ્યાર તમારા ગયા પછી….

‘નાઝિર‘નો સાથ છોડી જનારા જરા કહો,
કોને કરે એ પ્યાર તમારા ગયા પછી…..

~ નાઝિર દેખૈયા