🥀🥀
*કવિતાને સંગ*
ચહેરા પર આવતી કરચલીને કહી દો
ઉન્માદનો તાર નથી તૂટ્યો,
વાસંતી રંગ અમે કવિતાને સંગ આજ ઘૂંટ્યો !
ગીતો ને ગઝલોના સુગંધી ડાયરા
જીવતરના રસ્તે રોપાવ્યા,
લઈને ઓવારણા વૃક્ષોએ સામટા
પંખીના ટહુકા વરસાવ્યા,
ગમતો ગુલાલ લઈ, હૈયે ઉલ્લાસ લઇ
લથબથ રોમાંચ અમે ચૂંટ્યો….
કાગળ પર અડાબીડ ઊર્મિઓ કોળી
અક્ષર પર કેસુડા મહોર્યા,
કવિતાની મઘમઘતી પંક્તિઓ પર
ફાગણિયા ફાગ જ્યાં ફોર્યા!
પતંગિયાની પાંખે થઈને સવાર આવ્યો
ગમતો અવસર છે લૂંટ્યો !…..
સાંભળ્યું જરાક જ્યાં મધુકરનું ગાન
ત્યાં તો થઈ ગઈ ઉન્મત્ત આ મોસમ,
શબ્દો સૂરતાલમાં વહેતા થયાં
જ્યાં લાગણીઓ પથરાણી ચોગમ,
કળીઓનું જોબન ખીલી ઉઠ્યું
વાયરાને મૂંછનો દોરો ફૂટ્યો !….
વાસંતી રંગ અમે કવિતાને સંગ આજ ઘૂંટ્યો !
~ જિજ્ઞા ત્રિવેદી
વાસંતી રંગ જીવનને છલકાવે છે તો કવિતાનો રંગ આકાશી…. કવિએ આ બંને રંગને એક સમયમાં ઘૂંટયા છે… કહો, ઉન્મુક્ત આનંદ સિવાય શું નીપજે ?
@@
*ટુકડા થયાં*
જ્ઞાની હતા એના જ હાથે સત્યના ટુકડા થયાં,
ને ચીર ખેંચ્યા એ સ્થળે કર્તવ્યના ટુકડા થયાં !
મનની અદાલતમાં કરેલા કેસના અંજામમાં,
વર્ષો પછી પામ્યા હતા એ તથ્યના ટુકડા થયાં!
સંજોગની તીણી નજર કેવી હશે ભોંકાઈ કે –
ગમતા હતા જે આંખને એ દૃશ્યના ટુકડા થયાં !
ઉલ્ટા લગાવી આંખ પર ચશ્મા જગત જોયું પછી,
અજવાસની સાથે રહ્યા, સાતત્યના ટુકડા થયાં !
એણે અહંની ટોચ પર જઈને પ્રહારો બસ કર્યા –
ને એ પછી સાચા ઠર્યા મંતવ્ય ના ટુકડા થયાં !
તોડ્યું હૃદય લો એ પછી ધબકાર પણ થંભી ગયો,
આંસુ સ્વરૂપે પ્રેમ નામે દ્રવ્યના ટુકડા થયાં !
~ જિજ્ઞા ત્રિવેદી
જીગ્નાજીની કલમમાં એક માધુર્ય સભર અભિવ્યક્તિની બલકટતા જોવા મળે છે.
અભિનંદન. 🌹
કિશોરભાઈ, આપનો હૃદયથી આભાર.
વાહ, ગઝલ અને ગીત બંનેના ખૂબ જ સુંદર શબ્દો.
સાજ મેવાડાજી, આપનો હૃદયથી આભાર.
ગીત અને ગઝલ સંવેદનશીલ છે.
ઉમેશભાઈ જોશી, આપનો હૃદયથી આભાર.
બને રચનાઓ સુંદર થી અતિસુંદર
કીર્તિચંદ્રજી, આપનો હૃદય પૂર્વક આભાર.
બન્ને રચનાઓ ખુબ સરસ ખુબ ગમી
છબીલભાઈ ત્રિવેદીજી, આપનો હૃદયથી આભાર.
બંને રચનાઓ ગમી. જિજ્ઞાબેનને અભિનંદન. શુભેચ્છાઓ.
વાહ.. સરસ રચનાઓ