પૂછી બેઠા વ્યથાનું સરનામું;
હોય જાણે મજાનું સરનામું.
ઉમ્રભર શોધતાં જ રહેવાનું;
ને મળે ના કશાનું સરનામું.
જેમની આંખ પાણી પાણી છે;
એય પૂછે ઘટાનું સરનામું.
મારી દીવાનગી સલામત હો;
હોય છે ક્યાં કશાનું સરનામું.
આપણે ગૂમ થૈ ગયા એવા;
એક પૂછે બીજાનું સરનામું.
આપણે ગામેગામ ફરવાનું;
કોણ રાખે સદાનું સરનામું.
આપણે પણ જવાનું છોડીને;
‘મીર’ પાછળ બધાંનું સરનામું.
~ ડૉ. રશીદ મીર
ખૂબ સરસ મક્તા કહેવાયો છે.