*ઓ ઇશ્વર ભજીએ તને*
ઓ ઈશ્વર ભજીએ તને, મોટું છે તુજ નામ,
ગુણ તારા નિત ગાઈએ, થાય અમારાં કામ…
હેત લાવી હસાવ તું, સદા રાખ દિલ સાફ,
ભૂલ કદી કરીએ અમે, તો પ્રભુ કરજો માફ…
પ્રભુ એટલું આપજો, કુટુંબ પોષણ થાય,
ભૂખ્યા કોઈ સૂએ નહીં, સાધુ સંત સમાય…
અતિથિ ઝાંખો નવ પડે, આશ્રિત ના દુભાય,
જે આવે અમ આંગણે, આશિષ દેતો જાય…
સ્વભાવ એવો આપજો, સૌ ઇચ્છે અમ હિત,
શત્રુ ઈચ્છે મિત્રતા, પડોશી ઈચ્છે પ્રીત…
વિચાર, વાણી, વર્તને, સૌનો પામું પ્રેમ,
સગાં, સ્નેહી કે શત્રુનું, ઈચ્છું કુશળક્ષેમ…
આસપાસ આકાશમાં, હૈયામાં આવાસ,
ઘાસચાસની પાસમાં, વિશ્વપતિનો વાસ…
ભોંયમાં પેસી ભોંયરે, કરીએ છાની વાત,
ઘડીએ માનમાં ઘાટ તે, જાણે જગનો તાત.
ઓ ઈશ્વર તું એક છે, સર્જ્યો તે સંસાર,
પૃથ્વી, પાણી,પર્વતો, તેં કીધા તૈયાર…
તારા સારા શોભતા, સૂરજ ને વળી સોમ,
તે તો સઘળા તેં રચ્યા, જબરું તારું જોમ…
અમને આપ્યાં જ્ઞાન ગુણ, તેનો તું દાતાર,
બોલે પાપી પ્રાણીઓ, એ તારો ઉપકાર…
કાપ કલેશ કંકાસને, કાપ પાપ પરિતાપ,
કાપ કુમતિ કરુણા કીજે, કાપ કષ્ટ સુખ આપ…
ઓ ઈશ્વર તમને નમું, માંગુ જોડી હાથ,
આપો સારા ગુણ અને, સુખમાં રાખો સાથ…
મન વાણી ને હાથથી, કરીએ સારાં કામ,
એવી બુધ્ધિ દો અને, પાળો બાળ તમામ…
ઓ ઈશ્વર ભજીએ તને, મોટું છે તુજ નામ,
ગુણ તારા નિત ગાઈએ, થાય અમારાં કામ…
~ દલપતરામ
આ પ્રાર્થના સાંભળો અમર ભટ્ટના સ્વરમાં
21.1.22