🥀🥀
કવિતાપ્રેમી મિત્રો,
આનંદ છે કે ‘કાવ્યવિશ્વ’માં બે નવા વિભાગ શરૂ થયા છે. એક આ ‘હાઉક’ જેમાં બાળકાવ્યો મુકાશે
અને
બીજો ‘યુ…વાહ’ વિભાગ જે યુવાઓ માટે રહેશે. શાળા-કોલેજમાં ભણતા વિદ્યાર્થીઓની કૃતિઓ અહીં મુકાશે, અલબત્ત ગુણવત્તાની દૃષ્ટિએ જ પસંદગી થશે.
આપને આ ઉમેરા ગમશે જ. આપની આસપાસના વિદ્યાર્થીઓને તેમની કૃતિઓ મોકલવા કહેશો. આ email પર. આભારી છું.
kavyavishva1@gmail.com
🥀🥀
હજુ તો નાનાં બાળ અમે સૌ,
નાખે કેવો ભાર અરે! સૌ.
આ જુઓ, બોલાવે માટી, સાથે એની રમવા દો ને,
છીપલાં, મોતી, શંખ જણસ છે, ગજવે થોડાં ભરવા દો ને,
કાલે મોટાં થઈ જાશું તો આજે થોડું જીવવા દો ને,
સમજો થોડી વાત તમે સૌ
હજુ તો નાના બાળ અમે સૌ.
શૈશવની શેરીમાં મારે મનમોજી થઈ ફરવું છે,
આવડતું ના હોય ભલે ને, છબ્બાક દઈને તરવું છે,
જે કરવાની ના પાડો એ સૌથી પહેલાં કરવું છે,
છો ને કાઢો આંખ તમે સૌ
હજુ તો નાનાં બાળ અમે સૌ
ખુલ્લા આકાશે ઊડવાનું લાગે વહાલું વહાલું અમને,
મોજ પડે જો કોઈ કહે કે, જા બહારે જઈને રમ ને,
અમ સૌનું મન કળવા ઈશ્વર,થોડી સમજણ આપે તમને,
સંભાળો આ બાગ તમે સૌ
હજુ તો નાનાં બાળ અમે સૌ.
~ પૂર્વી અપૂર્વ બ્રહ્મભટ્ટ
👌👌👌
બાલકાવ્ય લેખન જેટલું માનીએ છીએ એટલું સહેલું નથી..
આપે આ વિભાગ શરૂ કરી ઘણું રોચક અને પથ્ય કાર્ય કરવા જઈ રહ્યા છો… અભિનંદન….
બાળકાવ્યોનો વિભાગ શરુ કર્યો તે જાણીને આનંદ થયો. પૂર્વી બેનનું કાવ્ય ગમ્યું.
ખુબ ખુબ અભિનંદન સહ સ્વાગત ખુબ આનંદ થયો