🥀 🥀
*આછી જાગી સવાર*
આછી જાગી સવાર,
નિંદરની મધુ કુંજ થકી ને સ્વપ્નલોકની પાર.
પારિજાતના શરણે ન્હાઈ
કોમલ એની કાય,
વ્યોમ આયને જેની છાઈ
રંગ રંગની ઝાંય;
ઑઢ્યો પાલવ સાગરજલનો છલછલ નીલનિતાર
આછી જાગી સવાર…
લહર લહર સમીરણની વાતી
કેશ ગૂંથતી જાણે,
અંબોડામાં શું મદમાતી
અભ્ર-ફૂલને આણે;
કે જેનો ઊડતાં પંખીના કલરવ માંહી બહાર
આછી જાગી સવાર….
ભુવનભુવનનાં ઉજ્જવળ રવિની
બિન્દી અહો લગાવી,
દિશા દિશાના મુખરિત કવિની
વાણી રહી વધાવી;
રંગમન્દિર જાવા જાણે સજી રહી સિંગાર
આછી જાગી સવાર….
~ પ્રિયકાંત મણિયાર (24.1.1927 – 25.6.1976)
હૃદયને મધુરતાથી ભરી દેતું આ ગીત સાંભળો અમર ભટ્ટના સ્વરમાં
OP 21.6.22
***