ખોટું ના લાગે તો વાત એક કહું ?
હું થોડા દિવસ હવે તારામાં રહું ?
કામમાં હશે તો હું વાત નહીં માંડુ,
મૌનમાંય કોઈ દિ’ ના છાંટા ઉડાડું,
શમણાંનો કાયદોય હાથમાં ન લઉં…. ખોટું
કોણ જાણે હિમ શી એકલતા જામી,
વૈદો કહે છે કે હુંફની છે ખામી,
કહે છે કે તારામાં લાગણી છે બહુ…… ખોટું
રોજ એક ઈચ્છા જો સામે મળે છે
આંખોમાં ભીનું થઈ નામ ટળવળે છે
તારામાં તારાથી આગળ નહીં જઉં…… ખોટું
રસ્તામાં કોઈ દિવસ કાંટા જો મળશે,
મારી હથેળી પછી પગ તારો પડશે,
વેદનાનો ભાર હું એકલો જ સહું…. ખોટું
કહેણ મોસમનું કોઈ મને ભાવતું નથી,
મને સાચકલે મારામાં ફાવતું નથી
એક ટીપાંની ઇચ્છા કે દરિયો હું થઉં….. ખોટું
~ મુકેશ જોષી
આ ગીત વાંચ્યું અને નોંધ્યા વગર રહેવાયું નહીં….
સાવ હળવી રીતે શરૂ થયેલાં કાવ્યમાં કેટલું ઊંડાણ !! કેટલો વ્યાપ !!
પ્રેમકાવ્યો તો ઘણાં મળે, આવાં અનોખાં જવલ્લે જ….
સીધાસાદા શબ્દો છે અને વિચાર તથા ભાવની ઊંચી ઉડાન છે. પોતાનું અસ્તિત્વ ઓગાળી કોઈમાં ઓતપ્રોત થવાય તો જ તેમાં રહેવાય. સુંદર ગીત.
ખુબ સરસ ભાવસભર રચના હળવા શબ્દો જ ઊંડા ઘાવ કરતા હોય છે પ્રાણવાન પ્રસ્તુતિ અભિનંદન
સમસંવેદનની ભૂમિકાએ વાચકને મૂકી દે એવી રચનાના કવિને અભિનંદન.
One of my favorite
Remarkable poet
મારા પ્રિય કવિનું મને બહુજ ગમતાં ગીતો પૈકીનું એક હદયસ્થ થઈ ગયેલું ગીત.
મુકેશ જોષીની ગીત રચના ખૂબ સરસ છે.
અભિનંદન..
કાંટા ને હથેળીની વાત કવિની લાજવાબ છે.
ખૂબજ.ગમ્યું