એક જ વિભુનાં
જાર તો વેરી છે એક જ ચોકમાં,
ચણવું ભીનો રાખી સાથ,
ભલે ને કંકર ફેંકે પારધી,
ઝીલજો રહીને સંગાથ,
આપણે સંતાનો એક જ વિભુનાં.
સાચું રે કહું તો વેરી કોઈ નથી,
જગ તો મોંઘેરું હાટ,
આખું રે ખડકાયું છે હેતથી,
લઈ લ્યો, જોશો ના વાટ,
આપણે સંતાનો એક જ વિભુનાં.
ડૂસકાં ઊગે જો કોઈ કુટિરમાં,
ધાજો, કરશો ના વાર,
પાણીડાં પાજો એને હેતનાં,
મનખો ઊતરશે પાર,
આપણે સંતાનો એક જ વિભુનાં.
વિભુએ ઘડ્યાં છે એક જ ઘાટમાં,
સૌનો એક જ કંથ,
વાડા રે મિટાવી દેજો ધર્મના,
આપણો એક જ પંથ,
આપણે સંતાનો એક જ વિભુનાં.
~ રતિલાલ સથવારા (10.1.1942)
ભજન જેવું આ ગીત સરળ હૃદયનું દર્શન આપે છે.
હ્રદયગમ્ય રચના.
‘આપણે સંતાનો એક વિભુનાં’ નું આવર્તન કવિને જે કહેવું છે એને દૃઢ બનાવે છે.
પ્રાર્થના ગીત જેવું ભાવવાહી
ખૂબ જ સરસ
ખુબ સરસ ગીત ખુબ ગમ્યુ
‘કાવ્યવિશ્વ’ની મુલાકાત લેવા બદલ આભાર છબીલભાઈ, મેવાડાજી, હરીશભાઈ, મીનલબેન, ઉમેશભાઈ