પાંદડું કેવી રીતે ~ રમેશ પારેખ
પાંદડું કેવી રીતે પીળું થયું કોને ખબર ?
એટલે કે ઝાડમાંથી શું ગયું કોને ખબર ?
શહેર પર ખાંગી થઈ વરસી પડી આખી વસંત,
એક જણ નખશીખ ઉજ્જડ રહી ગયું કોને ખબર ?
શાહીમાંથી આમ કાં ઢોળાય છે તારાં સ્મરણ ?
એને મારું એક મન ઓછું પડ્યું ? કોને ખબર ?
સ્વપ્નમાં વહેતી’તી નહેરો તારા ચહેરાની સત્ત,
ને સવારે આંખમાંથી શું વહ્યું ? કોને ખબર ?
માછલીએ એકદા જળને પૂછ્યુંઃ તું કોણ છે ?
એનો ઉતર શોધવા જળ ક્યાં ગયું, કોને ખબર ?
મેં અરીસાને અમસ્તો ઉપલક જોયો, ‘રમેશ’,
કોણ એમાંથી મને જોતું રહ્યું, કોને ખબર ?
~ રમેશ પારેખ
આવું વિચારી શકે અને એના પર ગઝલ આપી શકે એ રમેશ પારેખ જ..
આજે સંગીતકાર અને ગાયક આસિત દેસાઇનો જન્મદિવસ.
કવિ અને ગાયકને વંદન સહ.
કાવ્ય : રમેશ પારેખ સ્વર : આસિત દેસાઇ
***
28.6.22
દીપકભાઈ કે ગોહેલ
28-06-2022
આસિત દેસાઇ ને જન્મદિવસ ની શુભેચ્છાઓ સાથે રમેશ પારેખની સરસ ગઝલ માણવા મળી.
આભાર લત્તાબેન.
સાજ મેવાડા
28-06-2022
ખૂબ સુંદર ગઝલ માણવા મળી.
છબીલભાઈ ત્રિવેદી
28-06-2022
આસિતદેસાઈ ને જન્મદિવસ નીવધાઈ સાથે રમેશપારેખ ની સરસ રચના આભાર લતાબેન