તડકાનાં ઝાંઝર
તડકાનાં હું ઝાંઝર પહેરી રૂમઝૂમ રૂમઝૂમ ચાલું,
ખનક ખનક કૈં ઝાંઝર બોલે હું મસ્તીમાં મ્હાલું.
તડકો મારો દોસ્ત બનીને મારી પાસે આવે,
હળવે રહીને કાનમાં પૂછે : મારી સાથે ફાવે ?’
‘હોવ્વે’ કહીને એની સાથે બોલું કાલું કાલું,
તડકાનાં હું ઝાંઝર પહેરી રૂમઝૂમ રૂમઝૂમ ચાલું.
નાની મારી ગાગર બહેની એમાં તડકો ભરું,
એને મૂકી માથે હું તો અલકમલકમાં ફરું.
મુઠ્ઠીમાં પકડું તો છટકે કેમ કરી હું ઝાલું ?
તડકાનાં હું ઝાંઝર પહેરી રૂમઝૂમ રૂમઝૂમ ચાલું.
~ રામુ પટેલ ડરણકર
‘કાવ્યવિશ્વ’ને આ બાળકાવ્યસંગ્રહ મોકલવા બદલ આભાર
‘તડકાના ઝાંઝર’ ~ રામુ પટેલ ડરણકર * સાર્થક 2020
પડછાયો
પડછાયો મારો દોસ્ત બનીને રહેતો મારી સાથે,
સાવ ટચૂકડો થઈ જાતો, જો સૂરજ આવે માથે.
હું બેસું તો બેસી જાતો, હું ચાલું તો ચાલે,
મારી મરજી જાણી લઈને મારી સાથે મ્હાલે.
હું હસું તો હસવા માંડે, હું રડું તો રડે,
રસ્તે જાતાં હું લથડું તો ધબ્બ દઈને પડે.
અંધારાથી બહુ બીએ ને અંધારાથી ભાગે,
મારી અંદર સંતાઈ જાવા થોડી જગ્યા માગે.
ભણવા બેસું ત્યારે એ પણ મારી સાથે ભણે,
અઘરા દાખલા પણ ફટાફટ મારી સાથે ગણે.
~ રામુ પટેલ ડરણકર
‘કાવ્યવિશ્વ’ને આ બાળકાવ્યસંગ્રહ મોકલવા બદલ આભાર
‘તડકાના ઝાંઝર’ ~ રામુ પટેલ ડરણકર * સાર્થક 2020
ખુબ સરસ બાલ કાવ્યો ખુબ ગમ્યા
બધાને વાંચવા ગમે એવા સુંદર બાળકાવ્યો
વાહ બન્ને રચનાઓ ખૂબ સરસ ્્્્
અભિનંદન ્્્્્્્્્્્્્્્્્્
આવાં સરસ ગેય બાળકાવ્યો બાળકને કલ્પનામાં વિહરતાં કરી એમના વ્યક્તિત્વનો વિકાસ કરશે. અભિનંદન.
રામુભાઈને અભિનંદન ,એમની રચનાઓ નાના મોટા સૌ ને ગમે એવી છે જ,,હરીશ પંડયા ,ભાવનગર