ઝૂલણ મોરલી વાગી રે ~ લોકગીત
ઝૂલણ મોરલી વાગી રે, રાજાના કુંવર,
હાલો ને જોવા જાયેં રે,
મોરલી વાગી રે, રાજાના કુંવર.
ચડવા તે ઘોડો હંસલો રે, રાજાના કુંવર,
પીતળિયા પલાણ રે. – મોરલી…..
બાંયે બાજુબંધ બેરખા રે, રાજાના કુંવર,
દસેય આંગળીએ વેઢ રે. – મોરલી…..
માથે મેવાડાં મોળિયાં રે, રાજાના કુંવર,
કિનખાબી સુરવાળ રે. – મોરલી…..
પગે રાઠોડી મોજડી રે, રાજાના કુંવર,
ચાલે ચટકતી ચાલ્ય રે. – મોરલી….
ઝૂલણ મોરલી વાગી રે, રાજાના કુંવર,
હાલો ને જોવા જાયેં રે,
મોરલી વાગી રે, રાજાના કુંવર.
લોકગીતો સ્ત્રીઓએ જ રચ્યાં હોય… કોઈ સાબિતી નથી કેમ કે રચનાકારને જ એની કોઈ નથી પડી. પણ લોકગીતોનું માધુર્ય, એનું ભાવજગત જુઓ તો કોઈ શંકા રહે ખરી? આ અનામી સર્જકોને સો સો વંદન.
OP 3.10.22