શ્વેતા તલાટી ~ થોડાક શેર Shweta Talati

રોજ થોડું થોડું દિલ વીંધાય તો નીકળે ગઝલ
અશ્રુ થીજે, રક્ત જામી જાય તો નીકળે ગઝલ **  

રાખજો એ લક્ષ્ય સાથે યોગ્ય એક નકશો તમે
ને વિચારીને પસંદ કરજો પછી રસ્તો તમે **

રહે અજવાળું આખા ઘરમાં એ ઈચ્છા લઈ અંદર
સતત સળગ્યા કરે ફાનસ કથા એની કહું સાંભળ **

ફૂલ જેવા મૃદુ છે ને પહાડ સમ ભારેય એ
છે તમારા પર કે કેવા વાપરો શબ્દો તમે **

ખેલ અઘરો જીવનનો ને એમાંય
પ્રેમનો દાવ ખૂબ અઘરો છે **

હું રમું કાગળની હોડીથી ફરી?
વધતી ઉંમરનેય બચપણ જોઈએ **

ઘણું રડતું ‘તું પણ જો એકદમ શાંત છે
મળે બાળકને માને ખોળે, એવી હાશ શોધું છું **

આયનામાં કોઈ તડ સર્જાય છે
સત્ય જ્યારે પણ ઉઘાડું થાય છે **

ડાયરીમાં મેં ભર્યા ‘તાં પણ ક્યાં ગયા?
જિંદગી રંગીન પાનાં ફાડતી રહી **

હાથથી એના હું લે છટકી ગયો
એટલે ક્ષણભર સમય હબકી ગયો **

~ શ્વેતા તલાટી

શબ્દ પ્રત્યે લગાવ અને પ્રીતિ ધરાવનારા આ કવયિત્રી પોતે સભાનતાથી ગઝલને સમજવાનો પ્રયત્ન કરે છે
અને ગઝલસર્જનમાં પોતાનું રક્ત રેડે છે. ~ ગુલામ અબ્બાસ નાશાદ

શ્વેતાબહેન ઉત્તરોત્તર ગઝલના છંદ તથા બારીકીઓ જાણવા સમજવા ઉત્સુક હોય છે અને ગઝલ લખ્યા પછી પૂર્વસૂરિઓ સાથે સલાહ ઇસ્લાહ કરે છે એ જ એમની ગઝલને ક્રમશ: બળકટ બનાવે છે. ~ દિનેશ ડોંગરે ‘નાદાન’

શ્વેતા તલાટીએ સ્વબળે કરેલા ગઝલ પુરુષાર્થનું પરિણામ છે ‘ખામોશી’. એમાં રમલથી કામિલ સુધીની વિવિધ બહરોના પ્રયોગો ધ્યાન ખેંચે છે. ~ ડો. કુમાર જૈમિની શાસ્ત્રી

‘કાવ્યવિશ્વ’ને આ ગઝલસંગ્રહ ભેટ મોકલવા બદલ આભાર.
‘ખામોશી’ – શ્વેતા તલાટી
રન્નાદે પ્રકાશન 2023