સુરેશચંદ્ર પંડિત ~ કેટલાક શેર & ગઝલ * Sureshchandra Pandit

ગુજરાતી ગઝલ ક્ષેત્રે બે પંડિતનું પ્રદાન પ્રશંસનીય રહ્યું. એક તે સ્વ.કૈલાસ પંડિત અને બીજા તે આ રાજકોટવાસી (હવે સ્વ.) સુરેશચંદ્ર પંડિત.

નરસૈયાની નગરી જૂનાગઢ ખાતે 6 જૂન,1950 ના રોજ જન્મેલ શ્રી સુરેશચંદ્ર અનંતપ્રસાદ પંડિતનો પરિવાર બાદમાં રાજકોટ ખાતે  સ્થાયી થયેલ. આ કવિજીવને ક્યાંય સ્થિર થવું ગોઠ્યું નહીં. આજીવન છૂટક છૂટક નોકરી/ટ્યૂશન કરનાર આ કવિ ભાવે/સ્વભાવે અલગારી,ઓલિયો ફકીર !

છવાઈ જવાની ઘેલછાથી વેગળા રહીને આ ‘મસ્તફકીર’ કવિ નિજાનંદપૂર્વક, છાનેખૂણે પલાંઠી વાળીને પોતીકી ઢબે પાંચ પાંચ દાયકાઓ સુધી કવિતાસર્જન કરતા રહ્યા. રાજકોટની સુખ્યાત ‘સાહિત્યિક અભિગમની સંસ્થા : વ્યંજના’ સાથે જોડાયેલ રહીને સુરેશચંદ્ર પંડિતે કલાવર્તુળમાં પોતીકું નિરાળું સ્થાન પ્રાપ્ત કરેલ.

પંડિતજી એક કુશળ કવિ ઉપરાંત સુસજ્જ વાંસળીવાદક પણ જબરા ! આંખો મીંચીને

વાંસળીના છિદ્રો પર આંગળીઓ ફેરવતા અને ફૂંક મારીને  તલ્લીનતાપૂર્વક  વાંસળી વગાડતા તેમને જોવા અને માણવા એ એક લ્હાવો હતો. એ સ્વયં કહેતા વટપૂર્વક, “હું વાંસળીવાદક પણ ખરો ને ? “

સીધી સરળ બાનીમાં ઊંડાણ અને ઊંચાઈનો સંસ્પર્શ કરાવતી સુરેશચંદ્ર પંડિતની ગઝલોમાં નવતાપૂર્ણ રદીફ/કાફિયાનો કસબ અને તાજગીપૂર્ણ ભાવ-ભાષાનું સૌન્દર્ય સહુને આકર્ષિત કરતું રહયું.

~ આર.પી.જોશી રાજકોટ