આંખ બીડી ~ સૌમ્ય જોશી
આંખ બીડી હાથ બે ભેગા કરી;
એક ઈચ્છા આવવાને કરગરી.
બહાર નીકળીને પ્રવાહી થા હવે,
ઘટ્ટ ઘન આંસુની તીણી કાંકરી.
ખ્વાબમાં પણ રિક્તતાઓ છે હવે
ઓ હકીકત કઈ રીતે તું સંચરી.
ચોતરફ રખડ્યો ને ક્યાંય ના મળી,
એક પણ છાંટા વગરની એક છરી.
આઠદસ મહોરાંઓ પહેર્યાં કેમ તેં ?
એ ભલા માણસ તું માણસ છે કે હરિ ?
~ સૌમ્ય જોશી
એકેએક શેર દાદને લાયક પણ બીજા શેરનું કલ્પન અત્યંત ગમ્યું. આંસુને વહેવા માટે કવિ જે કહે છે એમાં પીડા કેવી બખૂબી આવીને બેઠી છે ! આંસુ ક્યાં, ‘કાંકરી’ છે ! વાહ…. એવું જ છેલ્લા શેરનું !
OP 5.7.22
***
સાજ મેવાડા
05-07-2022
વાહ, ખૂબ સરસ ગઝલ.
હરીશ દાસાણી.મુંબઈ
05-07-2022
સૌમ્યની ગઝલના દરેક શેર પાસે ઊભા રહી જવું પડે. ઓછા શબ્દોમાં બળકટ અભિવ્યકિત.
છબીલભાઈ ત્રિવેદી
05-07-2022
ખુબ સરસ રચના બધા શેર સરસ આપે કહ્યું તેમ બીજા શેર નુ કલ્પન અતિ સુંદર આભાર લતાબેન