સખી ! પરણ્યાને હળવે જગાડું !
વહેલી સવારનું સપનું મમળાવતી
હું ખુદના પડછાયામાં ભળતી
વીતેલી રાત મારી આંખ્યુંમાં કોણ જાણે
ઘી ‘ને કપૂર જેમ બળતી
હવે અધમણ રૂની બાળી દિવેટ એના અજવાસે આભલાં લગાડું
સખી ! પરણ્યાને હળવે જગાડું !
મેડી છોડીને ચાંદ ચાલ્યો ઉતાવળો
એ પલકારે વહી ગઈ રાત.
કહેતાં કહેતાંમાં પ્હો ફાટ્યું ને
સાવ મારી કહેવાની રહી ગઈ વાત !
એવું થાતું કે પે…લા બુઝાતા ચાંદને ઝાલરની જેમ રે ! વગાડું
સખી ! પરણ્યાને હળવે જગાડું !
પીપળા સન્મુખ જઈ ઊભી રહું તો
મારી માનેલી માનતાઓ ફળતી
એવી શ્રદ્ધાથી નિત મસ્તક નચાવી
હું મીઠા ઉજાગરાને દળતી
મને ચીડવતું ગામ કહીઃ ‘ભાંગ્યું ભરૂચ તો કોઈ કહે ભાંગ્યું રજવાડું ! ‘
સખી ! પરણ્યાને હળવે જગાડું !
~ હરિહર જોશી
કવિના જન્મદિને સ્મૃતિવંદના
નાજુક હાથે શૃંગાર-સ્પર્શનું આકર્ષક ગીત
સરસ ગીત કવિ શ્રી ને જન્મદિવસ ની શુભ કામના અભિનંદન કાવ્યવિશ્ર્વ
નાજુક, નમણું મજાનું ગીત.. અભિનંદન.
Yes નમણું નાજુક મજાનું ઞીત: મારા પણ અભિનંદન
ખૂબ સરસ ગીત છે પહેલી પંક્તિમાં લાગણી વણાઈ ગઈ છે.
સૌ મુલાકાતીઓનો આભાર