સાર છે
એ જ આશા રાખવામાં સાર છે,
બંધ છે એ શક્યતાનું દ્વાર છે.
આપણી બારી ઉઘાડી રાખીએ,
તો બધે અજવાસ પારાવાર છે.
લાગલું મીરાંપણું જ્યાં ઓગળે,
વાંસળીનો એ પછી વિસ્તાર છે.
આટલું ભળભાંખળું તો થઈ ગયું,
ક્યાં હવે દિ’ ઉગવામાં વાર છે ?
રંગ કેવો વૃક્ષ ઉપર ખીલશે !
એક ટહુકા પર બધો આધાર છે.
એ જતાં ને આવતાં વહેરે મને,
શ્વાસને પણ બેઉ બાજુ ધાર છે.
~ હર્ષા દવે
શેરીયતથી ભરેલા એક એક શેર. દરેક શેર એક નરવી હકારાત્મકતા લઈને આવે છે પણ છેલ્લો અદભૂત. એ નરવી નહીં પણ નકરી હકારાત્મકતા પીરસે છે. શ્વાસને બેય બાજુ ધાર છે એમ કહીને કવિ દરેક શ્વાસે જીવન કપાતું જાય છે અને મોત નજીક આવતું જાય છે એ સચ્ચાઈ તરફ ભાવકની આંખ ખોલે છે. વાહ કવિ !
વાહ સરસ ગઝલ.
વાહ, સરસ ગઝલ, સકારાત્મક, અને છેલ્લા શેર નું સત્ય .
વાહ ખુબ સરસ બધા શેર ખુબ ગમ્યા
દરેક શેરમાં હકારાત્મકતા ઘૂંટાઈને આવી છે. અભિનંદન.