વાહ રે મનવાજી તારું અલકચલાણું
પહોર થયો ને ત્યાંથી દોટયું રે દીધી અમે
કરમે કૈં જુદું ચિતરાણું મનવાજી મોરા
વાહ રે મનવાજી તારું અલકચલાણું…..
વેળા રે વસૂકી વળી વ્હેણના ઉછાળા થંભ્યા, થંભી રે મનખાની મોજું
પડતલ ના હોય એવા હલકારા સમજો શાણા, એમાંયે જુગત જેવું શોધું
કોને કોને હું પરમાણુ મનવાજી મોરા
વાહ રે મનવાજી તારું અલકચલાણું…
પંડયના જો હોય ઈને પૂછી તો લઈએ, હું તો ઉછીનું આયખું રગદોળું
અમથા અણસારાને ભોંયમાં ભંડાર્યા તોયે, હાથની રેખાયું હું તો ચોળું
ઘમ્મરવલોણું મંડાણું મનવાજી મોરા
વાહ રે મનવાજી તારું અલકચલાણું…
ડૂંખ વાગી રે મુને લીલી બપ્પોરની ને તે હું તો ઓળઘોળ થાઉં
આંખે અણોસરા આ લીલેરા ટહૂકાના, ક્યાંયે પડછંદા ના ભાળું
પ્રીતવછોયું મારું ગાણું મનવાજી મોરા
વાહ રે મનવાજી તારું અલકચલાણું…
~ સુરેન ઠાકર ‘મેહુલ’
કવિના જન્મદિને સ્મૃતિવંદના.
કાવ્ય : સુરેન ઠાકર ‘મેહુલ’ સ્વર અને સ્વરાંકન ~ સુરેશ જોશી આલ્બમ : શબ્દ સૂરની પાંખે
સરસ કાવ્ય ખુબ સરસ
વાહ, સરસ ગીત. કવિ શ્રી ને સ્મૃતિ વંદન.
કવિ શ્રી ને સ્મરણ વંદના.
ગીત ને સ્વરાંકન બંને સરસ. અભિનંદન.
મનવાજી તારું અલકચલાણું,, સરસ ગીત
કવિને સ્મૃતિ વંદના…..
વાહ ખૂબ સરસ મજાના ગીતનું ખૂબ સરસ સ્વરાંકન 👌
મસ્ત મજાની રચના….
વાહ..વાહ…