કિરીટ ગોસ્વામી ~ બે બાળગીતો * Kirit Goswami

ચક્કાભાઈ ~ કિરીટ ગોસ્વામી  

આ બાજુ છે એબીસીડી, આ બાજુ છે કક્કો…
વચ્ચે બેઠો મૂંઝાતો, આ નાનકડો એક ચક્કો!

ચક્કાભાઈનું મન તો જાણે પતંગિયું રૂપાળું
નાનું-નાનું, રંગબેરંગી, સુંવાળું-સુંવાળું
હમણાં ઊડું, હમણાં ઊડું, એવું એને થાય
ઊડવાની બસ વાત માત્રથી, એ તો બહુ હરખાય
ત્યાં જ ચોપડા ખડકી, પપ્પા કરતા, હક્કો-બક્કો!
તેથી બેઠો મૂંઝાતો, આ નાનકડો એક ચક્કો!

ચોપડીઓની સાથે પાછી આવી ઢગલો નોટ
પતંગિયું મટીને થાશે, મન એનું રોબોટ
હોમવર્કનો કાંટો એની પાંખોમાં ભોંકાય
પપ્પા કાઢે આંખો, તેથી કશુંય ક્યાં બોલાય?
‘ચોપડીઓ સારી કે ઊડવું?’ ખંજવાળે એ ટક્કો!
મનમાં-મનમાં, ખૂબ મૂંઝાતો નાનકડો આ ચક્કો!

~ કિરીટ ગોસ્વામી

જેમને બાળસાહિત્ય માટે કેન્દ્રિય સાહિત્ય અકાદમીનો એવોર્ડ મળેલો છે એવા કિરીટભાઈનું આ કેવું સરસ બાળગીત ! બાળકના મનને આબેહૂબ રજૂ કરતું.  

મમરાભાઈ ~ કિરીટ ગોસ્વામી  

મમરાભાઈ લંચબોક્સમાં કરતાં કૂદાકૂદ
લંચબોક્સ ખોલું તો પ્લેન બનીને ઊડાઊડ…

લાડુ બની જાય ત્યારે લાગે મીઠામીઠા
સેવ પ્લેટની સાથે પાછા થાય તીખા તીખા
બધાય એને ખાતાવેંત આપે વેરીગુડ
લંચબોક્સ ખોલું તો પ્લેન બનીને ઊડાઊડ…

કીડીબેન હરખે હરખે દરમાં તાણી જાતા
આ પપ્પુભાઈ ભેળપુરીમાં મીકસ કરીને ખાતા
સૌની સાથે હરતા ફરતા રાખે હળવો લુક
લંચબોક્સ ખોલું તો પ્લેન બનીને ઊડાઊડ…

~ કિરીટ ગોસ્વામી

સારા બાળગીતોની આજે ખૂબ જરૂર છે. અંગ્રેજી માધ્યમનો કકળાટ સાચો હોય તોય એ કરવાનો ખાસ અર્થ નથી. ગુજરાતીમાં સરસ બાળસાહિત્ય સર્જાય અને બાળકોને એ ગમે તો આપોઆપ ગુજરાતીનો વ્યાપ વધે. બાળગીતોમાં રોજિંદા જીવનની વાત કેવી સરસ રીતે વણાઈ ગઈ છે!