વતનમાં ફરી નહીં આવું
વાવ, વડલો અને ખળી શોધું
ક્યાંક અહિંયાં હતી ફળી, શોધું!
ના ઘસાયા વગર જઈ શકતાં
એ ગલીઓય પાતળી શોધું.
ગામ ગોકુળિયું કહાવો છો,
મોરનું પિચ્છ, વાંસળી શોધું.
એ અસલ ભૂખ, તાવડી, ચૂલો,
મા, ટપાકા ને તાંસળી શોધું.
એક ડાળે હતાં અડોઅડ પણ,
ફૂલ ના થઈ શકી, કળી શોધું.
બાળપણની સખીના અશ્રુઓ,
એ કપાયેલ આંગળી શોધું.
ક્યાંક માણેકથંભ રોપેલો,
અટલસી એક કાંચળી શોધું!
હું વતનમાં ફરી નહીં આવું
કેમ વરસેલ વાદળી શોધું?
~ વિજય રાજ્યગુરુ
માંગેલું કે શોધતા હોઈએ એ જીવનમાં ક્યાં મળે છે ?
વળો હવે ઘર ઢાળા
હોલાયા અંગારા, કવ છું વળો હવે ઘર ઢાળા!
જુઓ હવે આ રથ આવ્યો છે, ઘોડા છે પાંખાળા,
કવ છું વળો હવે ઘર ઢાળા!
સાથ આટલો હતો ગયો છૂટી અફસોસ ન કરશો,
ધુમ્રસેર વિખરાઈ જવા દો, મુઠ્ઠીમાં ન પકડશો!
ઝાંખીપાંખી અટકળને પણ મારી દેજો તાળાં,
કવ છું વળો હવે ઘર ઢાળા!
ક્યાંક કોઈ બોલાશ થશે, આંખો સામે ઝળહળશું!ચીજ જોઈતી નહીં મળે ને અમે સતત સાંભરશું!
પળો પાછલી ભેગી કરી કરી કરજો સરવાળા,
કવ છું વળો હવે ઘર ઢાળા!
અમે દૂધગંગાને કાંઠે રાહ તમારી જોશું,
તમે એકલા હાથે ઘરની પૂરી કરજો હોંશું!
કડકડતી ઠંડીમાં સ્મરણોથી રે’જો હુંફાળા,
કવ છું વળો હવે ઘર ઢાળા!
~ વિજય રાજ્યગુરુ
પીડતા સ્મરણો
કવિ શ્રી વિજયનો ગામ આ રાતે વર્ણવાયું છે.
કવિશ્રી વિજય રાજગુરુની બંન્ને રચનાઓ ગમી. અભિનંદન
ગામમાં શોધતું જડતું નથી. ને બીજી રચનામાં સંસ્મરણોની પીડા છે. બંને કાવ્યો સરસ છે. અભિનંદન
ખુબ સરસ બન્ને રચનાઓ ખુબ ગમી
બન્ને રચના ખૂબ સરસ ્