કહેવાય નહીં
આ ગીત તમને ગમી જાય તો કહેવાય નહીં,
કદાચ મનમાં રમી જાય તો કહેવાય નહીં.
ઉદાસ, પાંદવિહોણી, બટકણી ડાળ પરે,
દરદી પંખી ધરે પાય, ને ચકરાતું ફરે
તમારી નજરમાં ત્યારે કોણ કોણ શું શું તરે?
આ ગીત એ જ કહી જાય તો કહેવાય નહીં,
જરા નયનથી વહી જાય તો કહેવાય નહીં.
ઉગમણે પંથ હતો સંગ, સંગમાં ગાણું,
વિખૂટી ખાઈમાં ખુશીનું ગાન ખોવાણું
પછી મળ્યું, ન મળ્યું, થયું જવાટાણું ?
ખુશી જો ત્યાં જ મળી જાય તો કહેવાય નહીં,
આ ગીત તમને ફળી જાય તો કહેવાય નહીં.
કશું કહી ન શકાયું, ન લેખણે દોર્યું,
પરંતુ કાળજે એ ક્યાંક મૌનમાં કોર્યું
શિલાનું ફૂલ ન ખીલ્યું, ખર્યું ન, કે ફોર્યું,
આ ગીત ગુંજ વણી જાય તો કહેવાય નહીં,
તરી નિકુંજ ભણી જાય તો કહેવાય નહીં.
~ મકરંદ દવે
ક્ષણનાં ચણીબોર
કાળની કાંટા-ડાળીએ લાગ્યાં
ક્ષણનાં ચણીબોર.
બોરમાં તે શું? બોલતા જ્ઞાની,
આંખો મીંચી બેસતા ધ્યાની,
તોરીલા પણ કોઈ તોફાની
ડાળને વાળી, ડંખને ગાળી
ઝુકાવે ઝકઝોર.
પીળચટાં ને તૂરમતૂરાં,
કોઈ ચાખી લે ખટમધુરાં,
લાલ ટબા તો પારખે પૂરા,
વીણી વીણી આપતાં હોંશે
ચખણી ચારેકોર.
જ્ઞાની ચાલ્યા ખોબલે ખાલી,
ધ્યાની ઊઠ્યા નીંદમાં મ્હાલી,
અહીં અમારે ધરતી લાલી
ક્ષણ પછી ક્ષણ ખરતી આવે
ખેલતાં આઠે પ્હોર.
કાળની કાંટા-ડાળીએ લાગ્યાં
ક્ષણનાં ચણીબોર.
~ મકરંદ દવે
આઠે પહોર આનંદમય ઉજ્જવલ ક્ષણોનો સાક્ષાત્કાર કરતા કવિની કવિતાઓ
બન્ને ગીત અપ્રતિમ.
બન્ને કાવ્ય ખુબ સરસ ખુબ ગમ્યા
અર્થાત હવે ‘કાવ્યવિશ્વ’ બધાંને ખૂલે છે. આભાર.
કહેવાય નહિં ગીત ગમ્યું જ બીજુ ગીત અગમ્ય રહયું
અગમનિગમની વાત કાવ્ય સરસ કહેવાઈ છે. કવિ ચેતનાને પ્રણામ.
સાંઈ કવિની પ્રકૃતિ પ્રિતી ના ગીત.
Very nice