કૃપાદૃષ્ટિ કરે છે
એક હું ભીતર કૃપાદૃષ્ટિ કરે છે.
ને, બીજો બાહર કૃપાદૃષ્ટિ કરે છે.
વાયરા, વાદળ, નદી, પર્વત અને વન
આમ સચરાચર કૃપાદૃષ્ટિ કરે છે.
કાન ખેંચે, આંગળી ચીંધે કદીક એ
એક બે સહિયર કૃપાદૃષ્ટિ કરે છે.
રોજ ઊગતા પ્રશ્નનો ઉત્તર છે એક જ
“આ સમય સાદર કૃપાદૃષ્ટિ કરે છે”
જોઈને શિખર, તળેટી એમ લાગ્યું
કોણ કોની પર કૃપાદૃષ્ટિ કરે છે!
ક્યાંક પથ્થર, ક્યાંક પાણી થઈ જવાયું
કોઈ વેળાસર કૃપાદૃષ્ટિ કરે છે!
શું કરે બીજું વડીલો ઘરમાં રહીને?
કૂંપળો ઉપર કૃપાદૃષ્ટિ કરે છે.
~ લક્ષ્મી ડોબરિયા
ઉજાસના પર્વમાં ઉજાસ પાથરતા શબ્દો….
આગવું મારું વલણ
આસ્થા છે આગવી ને આગવું મારું વલણ.
ને, કૃપા છે આગવી ને આગવું મારું વલણ.
મેં ઝીલી તો દર્દની સોળે કળા ખીલી ગઈ,
આપદા છે આગવી ને આગવું મારું વલણ.
છે ધીરજ ને છે અરજ કે, જઈ શકું મારા સુધી,
જાતરા છે આગવી ને આગવું મારું વલણ.
ભીતરે વાળી નજર તો દૂરનું ભાળી શકી,
આ દશા છે આગવી ને આગવું મારું વલણ.
લ્હેરખી લટને રમાડે, વાયરો વાતો કહે,
ધારણાં છે આગવી ને આગવું મારું વલણ.
કંઈ નથી માં છે ઘણું, એ સાર અંતે તારવ્યો,
વારતા છે આગવી ને આગવું મારું વલણ.
દંભ, મ્હોરાં, ભ્રમ ઘણાં તૂટ્યા, ઘણાં મેં સાચવ્યા,
સાધના છે આગવી ને આગવું મારું વલણ.
~ લક્ષ્મી ડોબરિયા
લાંબો રદીફ પણ સરસ સચવાયો છે. ગઝલમાં કવિનો એક મિજાજ, એનું વ્યક્તિત્વ સુંદર રીતે ઉપસી આવે છે.
Happy Birthday dear Laxmiben
ખુબ સરસ રચનાઓ ખુબ ગમી
બન્ને રચના ખૂબ સરસ.
જન્મ દિવસની સુકામનાઓ.
આપની ટૂંક નોંધ સાથે સહમત. જૂદા જ પ્રકારની રદિફો, અને એને સાંગોપાંગ અર્થ સાથે સાચવી છે.
બંને રચનાઓ સરસ છે.અભિનંદન.
ખૂબ ખૂબ આનંદ સાથે આભાર.
મારો પણ આનંદ.
Excellent….
Happy birthday…my dear didi ji