ગાતાં ખોવાઇ ગયું ગીત
કે ગીત હવે શોધું ક્યાં કલરવની ભીડમાં
ઘેઘૂર ઉજાગરામાં ઊગે તે રાતને
આથમી ન જાય એમ રાખું
ભીડેલી પાંપણમાં કોણ જાણે કેમ
ફરી ઊઘડે પરોઢ તો ય ઝાંખું
આખું આકાશ પછી આવીને બેસતું પંખીના ખાલીખમ નીડમાં
ગાતાં ખોવાઇ ગયું ગીત
કે ગીત હવે શોધું ક્યાં કલરવની ભીડમાં
આંગળીની ફૂંકથી ન ઓલવી શકાય
એવા પથ્થરમાં ઝળહળતા દીવા
પાણીથી ફાટફાટ છલકાતાં હોય તો ય
ચીતર્યાં તળાવ કેમ પીવાં
જંગલ તોડીને વહે ધસમસ લીલાશ અને ભીંજે નહીં તરણું યે બીડમાં
ગાતાં ખોવાઇ ગયું ગીત
કે ગીત હવે શોધું ક્યાં કલરવની ભીડમાં.. રમેશ પારેખ
OP 19.10.2020
*****
Heena Modi
20-10-2020
લતાબહેન તમારી મહેનત મેઘધનુષમાં આઠમો રંગ પૂરી રહી છે.
શિરીષ અને હેમલતા કાપડિયા
19-10-2020
Lataben, you deserve all praise and for that
Hearty congratulations.
NiTiN Trivedi
19-10-2020
ખૂબ મજાનો ઉપક્રમ છે. કાળજી દેખાઈ રહી છે. સ્તુત્ય અને સરાહનીય! અઢળક અભિનંદન.
Chhabil bhai trivedi
19-10-2020
ખુબ સુંદર કાર્ય, ખુબ ખુબ અભિનંદન
સત્યમુની
19-10-2020
કાવ્ય રસિકો માટે ઉપયોગી બનશે.
લતાબેન આ સારી રીતે કરી શકશે.
અરવિંદ બારોટ
19-10-2020
કરવા જેવું કામ.
નિષ્ઠા, શ્રમ અને સાતત્ય વિના આવો ઉપક્રમ શક્ય નથી.ગુજરાતી સાહિત્યની આ અણમોલ સેવા છે. લતાબેન હિરાણીને અભિનંદન,આવકાર અને શુભકામના.
કેશુભાઈ દેસાઈ ગાંધીનગર
19-10-2020
મહત્ત્વાકાંક્ષી અને ઊંડી તૈયારી માંગતો સાહિત્યિક ઉપક્રમ.હાર્દિક શુભકામનાઓ.ગિરા ગુર્જરી નું ભવિષ્ય ઘણું ઊજળું લાગે છે!
સરલા સુતરિયા
19-10-2020
શ્રી ર પાની યાદ ઘેરી બનાવતું મજાનું ગીત.
રચના : રમેશ પારેખ – સ્વરાંકન : રિષભ મહેતા – સ્વર : રિષભ મહેતા અને ગાયત્રી ભટ્ટ