આંસુનો અનુવાદ કરી જો
દરિયામાં વરસાદ કરી જો !
ઘેરાયેલું વાદળ ખૂલશે,
ખુદ સાથે વિખવાદ કરી જો !
રણ-ડમરી વચ્ચે આંખોના
જળને ઝિન્દાબાદ કરી જો !
જન્મ પુષ્પનો મળ્યો તને તો,
ઝાકળથી સંવાદ કરી જો !
મળ્યું હતું તરબોળ પલળવા,
બંધ નયને યાદ કરી જો !
સરસ્વતીની પૂજામાંથી,
મુશાયરાને બાદ કરી જો
~ ભગવતીકુમાર શર્મા
આ કારણ-અકારણ અજંપાથી થાક્યો;
હું કાંઠો છું, મોજાંથી મોજાંથી થાક્યો .
ન દેખાય છે ડુગડુગી કે ન ચાબુક;
અગોચર,અનાહત તમાશાથી થાક્યો .
બુલેટોની ફૂટતી નથી ધણધણાટી;
નિરંતર તકાતા તમંચાથી થાક્યો .
ન છૂટી શકાતું, ન બંધાયેલો છું;
હું શ્વાસોના કાયમ સકંજાથી થાક્યો .
સજાની હવે કેટલી રાહ જોવી ?
દલીલો–તહોમત–પુરાવાથી થાક્યો .
ક્ષમા તો કરી દીધી છે ક્યારની મેં;
છતાં મોકલાતા ખુલાસાથી થાક્યો .
મુબારક મને મારાં આંસુ અટૂલાં;
તમારા બધાંના દિલાસાથી થાક્યો .
~ ભગવતીકુમાર શર્મા
બંને ગઝલો અપૂર્વ. અદ્ભુત. ભાવ અને વિચાર સંપદાથી શ્રેષ્ઠ.
વાહ બન્ને રચનાઓ ખુબ સરસ ખુબ ગમી
બન્ને ગઝલ સંવેદનશીલ અને હ્રદયગમ્ય છે…
વાહ, ખૂબ જ સરસ બંને રચનાઓ.