*જોઈએ*
પ્રેમમાં ક્યાં જાણકારી જોઈએ.
બસ હ્રદય વચ્ચે કટારી જોઇએ.
શ્રીહરી ને છોકરીમાં સામ્યતા,
બેઉ જણ માટે પૂજારી જોઇએ.
આપણા ઘરમાં જ હો ચાલે નહીં,
એમના ઘરમાંય બારી જોઇએ!
એ અગાસી પર સૂતેલા હોય તો,
ચાંદ પર મારે પથારી જોઇએ!
~ મુકેશ જોશી
હળવાશથી કરેલી શબ્દોની રમતને શેરમાં પલટવી સહેલી નથી !
*સોળ આનાની જિંદગી*
સોળ આનાની જિંદગી, બાર આનાનું દુ:ખ
ચાર આનામાં શું ખપે? તું હો બસ સન્મુખ
પાંચ આનાની કાયનો સાવ અનિશ્ચિત ખેલ
રોજ પીવાનો ધ્રાસકો વિધવા થઇ ગઈ ઢેલ
સાત આનાના વારમાં સપના સાત હજાર
આંખોથી જીરવાય નહીં તૂટેલો ભંગાર
આઠ આનાના દિ’ મહીં સુખના ખાલી હોજ
આઠ આનાની રાતમાં હીબકા ભરવા રોજ
દસ આનાના ખોબલે તિરાડ ભાળું એક
આંસુ ટાણે સરકંતા જોયા મિત્ર અનેક
ગ્યારહ આની નાવને તિલક કર્યું કુમકુમ
વૈતરણી તરવી હતી (પણ) બે ય હલેસા ગુમ
~ મુકેશ જોશી
કવિએ સોળ આની દુખ પીરસી દીધું છે.
બન્ને રચનાઓ ખુબ સરસ
દુઃખ વ્યક્ત કરવા સોળ આની કલ્પના સાવ નવી છે. અભિનંદન
મુકેશ જોષી મારા પ્રિય કવિની છે કારણકે તેમની કવિતાએ મને ક્યારેય નિરાશ નથી કર્યો.
વાહ, બંને રચનાઓ મજાની.
વાહ વાહ.. બહુ જ સરસ અને સરળ પણ…. સાહજીકતાથી કેવી ચમત્કૃતિ લાવી શકે એનું પરફેક્ટ ઉદાહરણ..