મને એ જ સમજાતું નથી ~ કરસનદાસ માણેક
મને એ જ સમજાતું નથી કે આવું શાને થાય છે
ફૂલડાં ડૂબી જતાં ને પથ્થરો તરી જાય છે !
ટળવળે તરસ્યાં, ત્યહાં જે વાદળી વેરણ બને,
તે જ રણમાં ધૂમ મુસળધાર વરસી જાય છે !
ઘરહીણાં ઘૂમે હજારો ઠોકરાતાં ઠેર ઠેર :
ને ગગનચુમ્બી મહાલો જનસૂનાં રહી જાય છે !
દેવડીએ દંડ પામે ચોર મૂઠી જારના :
લાખ ખાંડી લૂંટનારા મહેફીલે મંડાય છે !
કામધેનુને મળે ના એક સૂકું તણખલું,
ને લીલાંછમ ખેતરો સૌ આખલા ચરી જાય છે !
છે ગરીબોના કૂબામાં તેલનું ટીપુંય દોહ્યલું,
ને શ્રીમંતોની કબર પર ઘીના દીવા થાય છે !
~ કરસનદાસ માણેક
વિખ્યાત કવિ કરસનદાસ માણેકની આ લોકપ્રિય રચના એમની પુણ્યતિથિ નિમિત્તે સાદર વંદન સહ.
18.1.22
***
સાજ મેવાડા
18-01-2022
કવિશ્રીને વંદન, દરેક સમય આદી કાળથી કવિઓનૈ આવૌ પ્રશ્ન થયો છે.