તમારા પગ મહીં
તમારા પગ મહીં જ્યારે પડ્યો છું ;
હું સમજ્યો એમ – આકાશે ચડ્યો છું.
જતાં ને આવતાં મારે જ રસ્તે,
બની પથ્થર, હું પોતાને નડ્યો છું.
ઊછળતું દૂર ઘોડાપૂર જોયું,
અને પાસે જતાં ભોંઠો પડ્યો છું.
તમો શોધો તમોને એ જ રીતે,
હું ખોવાયા બાદ મુજને જડ્યો છું.
ખુશી ને શોક, આશા ને નિરાશા,
નિરંતર એ બધાં સાથે લડ્યો છું.
પરાજય પામનારા, પૂછવું છે –
વિજય મળવા છતાં હું કાં રડ્યો છું?
પ્રભુ જાણે કે મારું ઘર હશે ક્યાં?
અનાદિ કાળથી ભૂલો પડ્યો છું!
મને ‘શયદા’ મળી રહેશે વિસામો,
પ્રભુનું નામ લઇ પંથે પડ્યો છું. – શયદા
આખું નામ હરજી લવજી દામાણી ! પણ પ્રખ્યાત ‘શયદા’ ઉપનામથી. માત્ર ચાર ચોપડી ભણેલા આ શાયર મુશાયરાઓમાં જાન હતા
વિખ્યાત શાયર શયદા (24-10-1892 થી 30-06-1962)ની જન્મતારીખે એમને સ્મૃતિવંદન.
24.10.21
***
સાજ મેવાડા
25-10-2021
શયદા સાહેબ ની આ ગઝલ કંઇ કેટલીય વાર વાંચી હશે, છતાં ગમે છે, કારણ એમની સીધી અને સરળ ગુજરાતી ભાષા, જે એમણે ગઝલને ખરા અર્થમાં ગુજરાતી બનાવી હતી.
આભાર આપનો
25-10-2021
આભાર વારિજભાઈ અને છબીલભાઈ.
‘કાવ્યવિશ્વ’ની મુલાકાત લેનાર સૌનો આભાર.
છબીલભાઈ ત્રિવેદી
25-10-2021
આજનુ શયદા સાહેબ નુ કાવ્ય ખુબજ સમયોચિત આજે તેમના જન્મદિવસે પ્રણામ ઉપરોક્ત રચના શયદા સાહેબ ની ખુબજ જાણીતી રચના છે ખુબ ખુબ અભિનંદન આભાર લતાબેન
Varij Luhar
24-10-2021
શયદા સાહેબની શબ્દ ચેતનાને વંદન