આ ખળખળતા ઝરણાંને ઝળહળની માયા
આ મઘમઘતા ફૂલોને પાંખાળી છાંયા.
રે ઝાકળને આપી દો વહેવું વસંતી
ને ભમરાને સોંપી દો ખીલવું સુગંધી.
ગતિ કે સ્થિતિ હો તરસ પામવાની
તિમિર તેજનાં તળ અકળ માપવાની
આ નભ પાસે આવે ને પોતાનું લાગે
પછી ભોમ ખેંચીને હૈયે લગાવે.
ક્ષણક્ષણ સમયજળ તો વહેતું જ રહેશે
એ ઝીણેરા છાંટાઓ હળવેથી કહેશે,
ઘડીમાં જ સ્થાપી દો કલરવતા ગાણાં
ઘડીમાં ઉથાપી દો કંકાસી પાણાં*
થવા દો બધું આજ રંગીન રસબસ
ઊગ્યો જો ને સૂરજ, સવારો છે ધસમસ…
~ લતા હિરાણી
*પાણા (પથ્થર)
કાવ્યસંગ્રહો : 1. ‘ઝળઝળિયાં’ 2. ‘ઝરમર’
19.11.2020